Referat Folkemøte Landskapsparken
20 -25 personar møtte fram.
Møtet starta med ei orientering om tiltak som er gjort til no;
*Landskapsparken (LP) har gitt tilskot til oppgradering av vegen til Bjønndalen. Den vert også brøyta om vinteren og gjev eit flott utgangspunkt for skiturar.
*Det er kjøpt inn 2 kantklipparar som bygdefolk kan få leiga. Nils Håvik står for utleige og vedlikehald.
*Det er kjøpt inn ei bensindriven boremaskin med tanke på utleige.
*LP har også ytt økonomisk støtte til ulike andre tiltak:
-Meieriet restaurant,
-Morten Aasbø til privat reguleringsplan i samband med bubilplass,
-Herand båtlag i samband med utviding av båthamn, turstiar,
-innfallsport ved Mælavegen.
Dirk Kohlmann Tvedt frå Fylkesmannen si landbruksavdeling var med på møtet og orienterte om ulike måtar å organisera landskapsparkar på.
Han viste til modellar brukt i Åkrafjorden og på Fykse. ( Aksje-selskap og vanleg lag med medlemsskap ).
LP i Herand har i dag eit styre som er valt av Bygdelaget. No er det tydeleg signal frå Fylkesmannen at ein bør organisera det anleis. Dette vart drøfta på møtet, og ein kom fram til at Herand LP bør vera eit vanleg lag der ein kan betala medlemsavgift.
Noverande styre vert eit interimstyre og kallar inn til stiftingsmøte.
Hovudmålsetjinga til LP er å skapa næring. Det kan vera ny næring, eller vidareutvikling av eksisterande. På møtet vart ulike idear drøfta. Ein av dei er å laga eit utsal av lokalproduserte varer i sommarsesongen. ( Julemessa syner at det finns mykje!!)
Dei som møtte denne kvelden var engasjerte, og fleire ting vart drøfta.
Kan LP verta oppfatta som konkurrent til HB?
Bygdelaget vart i si tid stifta for å arbeida for ei triveleg og livskraftig bygd. Skal bygda vår vera livskraftig er det nødvendig å tenka næringsutvikling, og sidan dette er ei av målsetjingane for LP kan ein sjå på det som ei naturleg forlenging av HB og ikkje ein konkurrent.
Det vart også stilt spørsmål om det å vera landskapspark kan vera til hinder for konsesjon når det gjeld kraftutbygging. Dette meinte Kohlmann Tvedt at det klart ikkje skulle vera, særleg når ein ser på målsetjinga med næringsutvikling. Ein må ikkje forveksla landskapspark med nasjonalpark og tenka dei restriksjonane som ligg der.
Det vart også drøfta eit landskapsfond der ein kan få midlar til å stella kulturlandskapet. Dette vil ein koma tilbake til seinare.
ref. Margreta S. Eiken
Vegen til Bjønndalen vert no brøyta og eit fint skiterreng er blitt lett tilgjengeleg.
